રવિવારે સ્ટેચ્યુ ઓફ યુનિટી જોવા ગયેલા અમદાવાદીઓને થયો કડવો અનુભવ

સ્ટાફ સાથે થઈ ગઈ બબાલ

કેવડિયા કોલોની: રવિવારે સ્ટેચ્યુ ઓફ યુનિટી જોવા ગયેલા અમદાવાદના 300 જેટલા પ્રવાસીઓને વ્યૂ ગેલેરીમાં ન જવા દેતા રોષે ભરાયેલા પ્રવાસીઓએ હોબાળો કર્યો હતો. પ્રાપ્ત વિગતો અનુસાર, આ પ્રવાસીઓને વ્યૂ ગેલેરીમાં જવા માટે બપોરે 1 વાગ્યાનો સ્લોટ આપવામાં આવ્યો હતો. જોકે, બપોરના સાડા ત્રણ વાગ્યા સુધી તેમને ઉપર ન જવા દેતા પ્રવાસીઓ રોષે ભરાયા હતા.

અઢી કલાક લાઈનમાં ઉભાં રહ્યાં

સવારે આઠ વાગ્યે સ્ટેચ્યુ ઓફ યુનિટી જોવા પહોંચી ગયેલા અમદાવાદના પ્રવાસીઓએ વ્યૂ ગેલેરીમાં જવા માટે ટિકિટ પણ ખરીદી લીધી હતી. તેમાં તેમને 1 વાગ્યાનો સમય અપાયો હતો. જોકે, ભારે ભીડને કારણે એટલી બધી લાઈન હતી કે બપોરના સાડા ત્રણ વાગ્યા સુધી પણ તેમનો નંબર નહોતો આવી શક્યો.

લોકોએ ટિકિટના પૈસા પરત માગ્યા

અઢી કલાકથી પણ વધુ સમય સુધી લાઈનમાં ઉભા રહીને અકળાયેલા લોકોએ આખરે હોબાળો કરીને પોતાની ટિકિટના પૈસા પરત માગ્યા હતા. જોકે, સ્ટાફે તેનો ઈનકાર કરી દેતા પ્રવાસીઓ અને સ્ટાફ વચ્ચે ચકમચ ઝરી હતી. મામલો થાળે પાડવા માટે પોલીસને દરમિયાનગીરી કરવી પડી હતી.

રજાના દિવસે ભારે ભીડ

વિશ્વના સૌથી ઉંચા એવા સ્ટેચ્યુ ઓફ યુનિટીને જોવા માટે મોટી સંખ્યામાં લોકો આવતા રહે છે. તેમાંય રવિવાર તેમજ જાહેરરજાઓ પર તો જબરજસ્ત ભીડ હોવાના કારણે ઘણીવાર વ્યવસ્થા જાળવવામાં પણ તકલીફ ઉભી થાય છે. આવી જ ઘટના રવિવારના રોજ બની હતી, જેમાં ભારે ભીડ હોવાના કારણે અમદાવાદના પ્રવાસીઓને વ્યૂ ગેલેરી સુધી જવા નહોતું મળ્યું.

કલાકો સુધી લાઈનમાં ઉભું રહેવું પડે છે

સ્ટેચ્યુ ઓફ યુનિટીમાં ઉંચાઈ પર વ્યૂ ગેલેરી બનાવાઈ છે, જેના દ્વારા લિફ્ટ સુધી પહોંચવાનું હોય છે. જોકે, મ્યુઝિયમ જોઈ લીધા બાદ મુલાકાતીઓને ભારે ભીડના કારણે કલાકો સુધી લિફ્ટની લાઈનમાં ઉભા રહેવાની ફરજ પડે છે. તેમાંય ઘણીવાર તો લિફ્ટ પણ ખોટકાઈ જતી હોવાની ફરિયાદો પણ સામે આવી ચૂકી છે.

350 રુપિયા ટિકિટ

182 મીટરની ઉંચાઈ ધરાવતા સ્ટેચ્યુ ઓફ યુનિટીમાં 153 મીટરની ઉંચાઈ પર વ્યૂ ગેલેરી બનાવાઈ છે, જ્યાં પહોંચીને જંગલો અને પર્વતો વચ્ચે વહેતી નર્મદા નદીનો નયનરમ્ય નજારો માણી શકાય છે. વ્યૂ ગેલેરી જવા માટે દરેક વ્યક્તિ દીઠ 350 રુપિયાની ટિકિટ ખરીદવી પડે છે.

from Page Array – I Am Gujarat https://ift.tt/2QU1n5Z


from Gujarati Blog Tips-In this guide we are going to see how to Advertise On Facebook,Free Website https://ift.tt/2BsHhWO